КОЛЛЕЖДА – ТАДБИРКОРЛИК
Бугун бюджетдан ташқари қўшимча маблағ топиш, бозорларимизнинг тўкин-сочинлигини таъминлаш мақсадида Зарафшон Тиббиёт коллежида ходимлар тадбиркорликка жалб қилиниб, иссиқхона ташкил этишган.
Коллеждаги 2 сотихли иссиқхонада лимон, папая ва турли хил кўкат ҳамда гул кўчатлари етиштириб келинмоқда.
- 2012 йили коллежимиз ҳовлисида иссиқхона фаолиятини йўлга қўйгандик, – дейди Зарафшон Тиббиёт коллежи директори Моҳира Болтаева. – Ўтган йиллар давомида педагоглар ва ўқувчиларни жалб этган ҳолда 15 дона лимон, 5 дона папая, гул кўчати ва турли кўкатларни парваришлаб келаяпмиз. Меҳнатимиз ўз самарасини бериб, жорий йилда 2 миллион сўм даромад қилдик. Фойданинг бир қисмини коллежимиз биносини замонавий безаш, жиҳозлаш ишларига сарфладик. Муҳими, ўқувчиларимизнинг мазкур жараёнда бевосита иштирок этиши улар қалбида табиатга меҳр, меҳнатсеварлик туйғулари шаклланишида асқотаётир.
Деҳқончилик сирларини анчагина ўзлаштирган коллеж жамоаси жорий йилда 6 сотих ерга саримсоқ пиёз, 4 сотих кўкпиё ва 3 сотих ерга эса исмалоқ экишган.
- Ер хазинанинг ўзгинаси, – дейди коллеж боғбони Асрор Бозоров. – Агар ундан унумли фойдаланса, жамоага катта даромад келтиради. Январь ойи иссиқхонамизга турли гул кўчатларини экамиз. Етилган гул кўчатларини апрель ойида коллежимиз ҳовлисига кўчириб ўтқазамиз. Шу тариқа коллежимиз ҳам гулзорга айланади, ҳам анчагина маблағни иқтисод қилиб қоламиз.
Кўринадики, Зарафшон Тиббиёт коллежида амалга оширилаётган бундай ташаббуслар бугун жамоага мақбул келяпти. Муҳими, бу ибратли ишлар бозоримиз тўкин-сочинлиги, арзончиликни таъминлаш билан бирга, ходимлар фаровонлигини янада ошириш имконини беради.
Д.БОБОМУРОДОВ.
